منتديات عبقرية التفوق
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.
المواضيع الأخيرة
» الوحدة الثانية|الدرس الثاني: معادلة المستوى في الفراغ - الجزء الثاني
حقيقة فيلم الناصر صلاح الدين Empty29/6/2020, 15:15 من طرف Mariam El Araby

» الوحدة الثانية|الدرس الثاني: معادلة المستوى في الفراغ - الجزء الاول
حقيقة فيلم الناصر صلاح الدين Empty29/6/2020, 15:14 من طرف Mariam El Araby

» الوحدة الثانية| الدرس الاول: معادلة المستقيم في الفراغ - الجزء الثاني
حقيقة فيلم الناصر صلاح الدين Empty29/6/2020, 15:12 من طرف Mariam El Araby

» الوحدة الثانية| الدرس الاول: معادلة المستقيم في الفراغ - الجزء الأول
حقيقة فيلم الناصر صلاح الدين Empty29/6/2020, 15:11 من طرف Mariam El Araby

» الوحدة الاولي|الدرس الثالث: ضرب المتجهات - الجزء الثالث
حقيقة فيلم الناصر صلاح الدين Empty29/6/2020, 15:09 من طرف Mariam El Araby

» الوحدة الاولي|الدرس الثالث: ضرب المتجهات - الجزء الثاني
حقيقة فيلم الناصر صلاح الدين Empty29/6/2020, 15:07 من طرف Mariam El Araby

»  الوحدة الاولي|الدرس الثالث: ضرب المتجهات - الجزء الأول
حقيقة فيلم الناصر صلاح الدين Empty29/6/2020, 15:06 من طرف Mariam El Araby

»  الوحدة الاولي|الدرس الثاني: المتجهات في الفراغ - الجزء الثاني
حقيقة فيلم الناصر صلاح الدين Empty29/6/2020, 15:04 من طرف Mariam El Araby

» الوحدة الاولي|الدرس الثاني: المتجهات في الفراغ - الجزء الأول
حقيقة فيلم الناصر صلاح الدين Empty29/6/2020, 15:02 من طرف Mariam El Araby

» الوحدة الاولي|الدرس الاول:النظام الأحداثي المتعامد في ثلاث ابعاد - الجزء الثاني
حقيقة فيلم الناصر صلاح الدين Empty29/6/2020, 15:00 من طرف Mariam El Araby


حقيقة فيلم الناصر صلاح الدين

2 مشترك

اذهب الى الأسفل

حقيقة فيلم الناصر صلاح الدين Empty حقيقة فيلم الناصر صلاح الدين

مُساهمة من طرف Admin 4/12/2015, 14:47

حقيقة فيلم الناصر صلاح الدين 13834510

الموضوع بقلم الكاتب : أحمد حسنى

الناصر صلاح الدين 1963
انهم يلعبون فى صواميل مخى
==================
شفت فيلم الناصر صلاح الدين ؟؟
فيلم حلو و جميل و بيلعب على وتر حساس .. الدين لله و الوطن للجميع .. العرب كسحوا و كسروا جيوش اوروبا .. الشاب العربى اللى علق ناديه لطفى قائدة الهوسبيتاليين و ريتشارد الفارس الجسور الشهم النبيل.
الفيلم ده و معاه فيلم تانى (عنتره بن شداد) كانوا بيتعرضوا فى التليفزيون المصرى يوم 4 مايو من كل سنه ..
عنتره العصر و الناصر صلاح الدين بليل ..
حد يعرف او يخمن ليه ؟؟
بالظبط يا فندم ... عيد ميلاد القائد المفدى .. الطيار اللى بهدل اسرائيل بالطيران ..
القائد الملهم .. صاحب اول طلعه جويه فتحت باب الحريه ..
ياريته كان ضربنا احنا و حكمهم هما 30 سنه ..
ما علينا ..
المعلومه دى كسبت فيها رهان مع امى على ديك رومى .. طلع عندى حق .. و اشتريتلها الديك الرومى فى الاخر.
الفيلم سينمائيا جميل جدا ..
- 9000 جنيه ...اعلى اجر لمخرج وقتها
- 200 الف جنيه ... اكبر ميزانية انتاج من اسيا داغر
- نجوم كتير ملهاش عدد
- ظل زكى طليمات و هو بيلعب فى دماغ حمدى غيث علشان يرفض الدعوه وهو على رقعة الشطرنج كان احمر .. مع ان الظل دايما اسود .. بمقاييس العصر ده المشهد ده يعتبر تكنولوجيا متقدمه جدا.
بالرغم اللغه العربيه الكوميديه فى الفيلم .. لا هى فصحى ولا هى عاميه .. انما عموما اداء حمدى غيث كممثل غطى على كل شيء .. انا نفسى كنت متأكد ان ريتشارد الحقيقى ميختلفش كتير عن حمدى غيث و لما شفت صورة ريتشارد الحقيقى اتصدمت .. كمان انا حبيت ريتشارد فى الفيلم اكتر من احمد مظهر بكتير.
طيب .. انا زعلان ليه بقى؟؟
تاريخيا .. الفيلم ده يعتبر كارثه .. اخطاء بالجمله .. جيل كامل "و انا منهم" اتربى و كبر على معلومات غلط 100% .. منها الخطأ الصريح و منها الغير منطقى.
انا مش باحث تاريخى .. انا بس لفت نظرى شوية حاجات مش منطقيه .. مع القراءه و السفر .. الحاجات الغير منطقيه زادت .. فقررت انى افضفض .. لعل و عسى صوتى يوصل للمرحوم صلاح الدين .. و يقوله احنا اسفين يا صلاح.
حد هيقولى ده فيلم .. سينما .. دراما يعنى ..
مفيش مشاكل .. بس يبقى معروف ان الفيلم لا يعبر عن التاريخ فى شيء.
و دى دايما وجهة نظرى المتواضعه جدا فى الافلام التاريخيه و الدينيه .. لايصح انها تكون وجهة نظر .. انما الافضل و الاصح انها تكون سرد تاريخى .. مجرد سرد .. كفايه ان لحد النهارده فى ناس متعرفش ان انتونى كوين يختلف تماما عن عمر المختار و ان المسيح مش هو روبرت بويل.
.
اولا : صلاح الدين قائد عربى
==================
معلومه كفته تماما .. الملك الناصر أبو المظفر صلاح الدين والدنيا يوسف بن أيوب بن شاذي بن مروان بن يعقوب الدُويني التكريتي ... مولود فى تكريت (العراق) من بيت كردى هو بيت نجم الدين ايوب
و نسب الايوبيين يعود الى أيوب بن شاذي بن مروان من أهل مدينة دوين في أرمينيا.
يعنى كردى من أصل ارمنى ... مش عربى.
المصدر : النوادر السلطانية والمحاسن اليوسفية - سيرة صلاح الدين الايوبى
تحقيق الدكتور جمال الدين الشيال .. الطبعه الثانيه
.

ثانيا : عيسى العوام مسيحى
=================
معلومه تانيه كفته ... عيسى العوام كان جاسوس مسلم ماهر جدا فى السباحه من ابرع جواسيس صلاح الدين .. ورد ذكره فى كتاب القاضي بهاء الدين بن شداد .. قال عنه انه كان بيدخل و يخرج من عكا
ايام الحصار بمهاره شديده و كان اذا رجع البلد يسبقه منادى يدور فى البلد و يقول عيسى العوام رجع .. عيسى العوام رجع.
فى احد المهام كان فى البحر و رابط حوالين وسطه 3 اكياس فيها الف دينار دهب و رسايل للجيش .. البحر هاج عليه فغرف .. المنادى اتأخر فى الاعلام عن وصوله .. فتشائم الناس .. بعدها بيومين البحر لفظ جثته على الشاطى.
يعنى عيسى العوام مات قبل المعركه الفاصله .. يبقى قابل لويزا فين بقى ؟؟؟ ده اذا سلمنا ان قائدة اشرس كتيبه فى الجيش كان واحده ست .. و صغيره و حلوه كده و لا مؤاخذه ‏‎grin‎‏ رمز تعبيري
كمان اثناء زيارتى لعكا شفت بعينى تمثال صغير على البحر مقابل لقلعة عكا .. مكتوب تحته .. "البطل المسلم عيسى العوام ... ادى الامانه حتى بعد وفاته" ده لأنهم لقوا الدهب المربوط حوالين وسطه سليم .. و الدهب كان لمصروفات الجيش.
المصدر : النوادر السلطانية والمحاسن اليوسفية - سيرة صلاح الدين الايوبى
تحقيق الدكتور جمال الدين الشيال .. الطبعه الثانيه

ثالثا : اورشليم
=========
العرب فى الوقت ده عمرهم ما قالوا عن بيت المقدس اورشليم و لا حتى القدس .. اورشليم هى اسم انثى باللغه الاراميه (لغة المسيح عيسى الاصليه) كانت زوجه لواحد من ابناء سيدنا يعقوب اسمها اهوليبا .. هاجرت من مصر و استقرت فى المكان ده و عرفت بأسم اورشليم ..
مش متأكد من الجزء الاخير ده الحقيقه .. انما متأكد منه هو ان اسم اورشليم باللغه الاراميه القديمه يعنى مدينة السلام.
القدس بالانجليزي "جيروسيلم .. بالعبري "يروشالايم" .. اليهود العرب بيكتبوها أورشليم .. اصلها الارامى اور سالم.
طيب ..
سلام تعنى شالوم
مدينه تعنى عير
يبقى مدينة السلام معناها ايه ؟؟
عير شالوم .. صح كده .. الاكيد كمان ان العرب عمرهم ما قالوا عنها اورشليم .. انما كان اسمها دائما الارض المقدسه او بيت المقدس.
المصدر : معجم المعانى
.
رابعا : والى عكا
==========
الراجل ده مظلوم اوى يا جدعان.
الثابت تاريخيا ان والى عكا كان بطل .. فضل يقاوم الاسطول الصليبى 20 شهر .. و اخر معاركه معاهم قتل منهم 600 و اسر 270 ... و لم يقبل بتسليم المدينه الا بعد اتفاق مع قادة الاسطول يضمن الحفاظ على حياة اهل عكا .. و اول ما دخلو البلد هو اول واحد رموه من فوق السور و قتلوا اكتر من 2000 اعزل من اهل عكا.
يعنى تحول من بطل الى خائن .. و من شجاع الى خادم يصب الخمور الى ملوك اوروبا و من محارب يدافع عن ارضه الى مرتشى جبان يبيع اهله فى مقابل وعود زائفه
و كل ده ليه ؟؟
علشان خاطر فرجينيا .. جمبلة الجميلات الغير موجوده الا فى خيالنا احنا بس.
كمان فى معلومه محتاجه تحقيق بتقول ان والى عكا ده .. هو نفسه بهاء الدين الاسدى .. وزير صلاح الدين القوى المشهور تاريخيا بأسم قراقوش .. صلاح الدين ارسله الى عكا للدفاع عن المدينه .. فأكمل بناء السور و القلعه و التحصينات
و استمات فى الدفاع عن البلد زى ما حكينا .. محتاج مراجع اكتر للمعلومه دى .. المتوفر غير كافى.
مصدر (1) : النوادر السلطانية والمحاسن اليوسفية - سيرة صلاح الدين الايوبى
تحقيق الدكتور جمال الدين الشيال .. الطبعه الثانيه
مصدر (2) : الوطن العربي والغزو الصليبي - خاشع المعاضيدي (الطبعه الاولى - صفحة 123)
.
خامسا : لويزا قائدة الهوسبيتاليين و فرجينيا صاروخ الصواريخ
==================================
فرقة فرسان ماطله .. او فرقة القديس يوحنا .. اسامى مختلفه لفرقه شديدة الشراسه من فرق الجيش الصليبى .. كونها الايطاليين فى البدايه فى جزيرة مالطه .. خرجت من رحم الجماعه الام و هى فرقة فرسان المعبد ذات السمعه السيئه.
طيب .. الاسم العجيب ده .. الهوسبيتاليين .. جه منين ؟؟
فى بداية تشكيل الفرقه دى .. كان الهدف منها حماية المرضى و الجرحى فى مستشفى القديس يوحنا القريب من بيت لحم فى فلسطين .. علشان كده اخدت اسم فرقة القديس يوحنا .. او فرقة فرسان المستشفى .. "Hospitaliers" .. و بقدرة قادر .. الترجمه قلبتها هوسبيتاليين.
طيب .. فرقة فرسان المعبد .. "Knights Templars" .. ليه مقلناش عليهم التيمبليين و نقول كمان لندنيين و باريسيين و برلينيين ؟؟
عموما .. انا ممكن اسامح يوسف شاهين مخصوص علشان خاطر لويزا دى ... الست عامله زى المانجايه .. مفيهاش غلطه يا ناس .. طبعا انا بتكلم عن ناديه لطفى .. المشكله بقى ان لم يرد ذكر الاسماء دى اطلاقا فى اى مصدر عربى او اجنبى .. حتى فى المتحف البريطانى نفسه (اقدم و اهم متاحف العالم) .. اعنى لويزا دى لويزينيون طبعا .. اسم دى لويزينيون ده بتاع واحد تانى خالص هنتكلم عنه فى النقطه الجايه.
الثابت كمان ان فرقة فرسان مالطه كانت اشرس و اقوى فرقه فى الجيوش الصليبيه كلها و كانت بتتعرض لاختبارات الحرق الجزئى بالنار لاثبات قوة التحمل و الولاء .. كمان السيوف الاوروبيه وقتها كان وزن الواحد فيهم فى حدود 8 كيلو و طوله 120 سنتى زى ما هو معروض فى المتحف البريطانى و لبسهم كان دورع حديد .. يعنى علشان تشيل سيف و تلبس درع من دول .. محتاجلك 3 شهور فى الجيم علشان تعمل فورمة الحرب.
يبقى ازاى الكتكوته الكيوته دى تقدر تشيل سيف زى ده و تلبس حديد و كمان تحارب و تبقى قائدة اشرس الفرق المحاربه ؟؟؟
كمان فرقة الفرسان دى كانت من الشراسه و الهمجيه انها لو شافت واحده زى ناديه لطفى كده على بعد كيلو .. ممكن ياكلوها .. مش يخلوها القائد بتاعهم.
بقى انت هترمى القطه دى .. وسط عساكر جيش ؟؟
كلام مش راكب خالص على بعضه يا جدعان.
طبعا هى طالعه فى الفيلم بتستحمى و اتكسفت من عيسى العوام .. قالتله غمى عنيك يا سافل .. و هو راح مديها ضهره علشان عيب .. راحت جايه راشقه السهم فكتفه .. و قالتله المره الجايه السهم يصيب قلبك .. و راح الجدع مفرفر فى ايديها.
معاه حق طبعا .. انا نفسى كنت بتفرج و ماسك ورده و مشغل جمبى فاتت جمبنا لعبد الحليم.. بس الكلام ده يبقى منطقى لو حصل مثلا فرايدايز او تيفولى هيليوبوليس .. انما فى حطين .. و الحرب شغاله .. اعتقد صعب .. كتير عليا كده الصراحه.
اما عن فرجينيا .. ففى كل كتب التاريخ و المصادر اللى قريتها .. لم يذكر اى واحده بالمواصفات دى خالص .. زوجات رينو هنتكلم عنهم .. لم يكن فيهم اى واحده اسمها فرجينيا ولا صاروخيه زى ما شفنا كده.
يعنى فرجينيا طلعت وهم يا جدعان .. يا خساره .. ده انا كنت بحبها اوى .. خصوصا بعد ما وقعت الدنيا فى بعضها بأسلوب لولا صدقى و ميمى شكيب.
مصدر (1) : The Leper King and His Heirs – الملك المجذوم و ورثته.
بلدوين الرابع و الصليبيين فى مملكة القدس – الصادر من جامعة كمبريدج "انجلترا" – برنارد هاميلتون 1 يناير 2000
مصدر (2) : الحروب الصليبيه كما رأها العرب – امين معلوف
.
سادسا : رينو السفاح
============
هذا رجل مثير للجدل و القلق.
رينو دى شاتيون .. او ما ننطقه بالعربى أرناط .. مجرم طريد من اوروبا .. سافر للقدس سنة 1147 و حط قدراته فى خدمة الملك بولدوين الثالث .. اللى استخدمه فى حماية كونستانزا اميرة انطاكيه .. الست جوزها مات سنة 1149 .. راحت متجوزه رينو سنة 1153 .. مضيعتش وقت .. و من هنا بقى رينو امير انطاكيه.
استمرت حملات رينو الهمجيه ضد قوافل الحجاج و قطعان المواشى .. و حاول اكتر من مره السيطره على المدينه و مكه و نبش قبر الرسول .. لكنه فشل .. فى احد هجماته على قطعان المواشى فى سهول حلب وقع فى فخ نصبه ليه الامير الزنكى مجد الدين ابن الدايه .. اتسجن 16 سنه فى حلب .. خرج بعدهم لقى مراته ماتت بعد ما سلمت ملك انطاكيه الى بيهموند التالت .. ابن جوزها الاولانى.
رجع صاحبنا على القدس .. سلم نفسه للملك بولدوين الرابع .. وقتها كانت ستيفانى ارملة اوتر جوردون (امير الكرك) موجوده و شغاله .. اتجوزها رينو و من هنا بقى امير الكرك.
اتجوز مرتين .. كل جوازه بممكله .. ابن المحظوظه.
رينو دى شاتيون و صاحبه الانتيم جى دى لويزينيون وقعوا اسرى القائد حسام الدين الصارم التكريتى .. حسام الدين سلمهم لصلاح الدين .. صلاح الدين عمل خيمه كبيره لأسرى الحرب من الامراء .. و اخد الاتنين دول تحديدا علشان يعمل معاهم الصح.
امر صلاح الدين بشراب ساقع .. اعطى منه لجى دى لويزينيون بس .. الراجل عزم على صاحبه .. صلاح الدين اتنرفز .. و راح مطير رقبة رينو و بعتها لخيمة الامراء الاسرى .. و قالله وقتها قبل ما يقتله "ها انا انتصر لمحمد" لأن رينو لما هجم على قافلة الحجاج قاللهم "اطلبوا النجده من محمد" بس بلفظ سافل.
مصدر (1) : النوادر السلطانية والمحاسن اليوسفية - سيرة صلاح الدين الايوبى
تحقيق الدكتور جمال الدين الشيال .. الطبعه الثانيه
مصدر (2) : الحروب الصليبيه كما رأها العرب – امين معلوف
.
سابعا : ريتشارد قلب الاسد .. الملك الكيوت
=========================
من الفيلم .. انا حبيت ريتشارد الصراحه اكتر من احمد مظهر .. و زعلت اوى انه مشى من عندنا .. ياريته كان قعد طالما هو راجل مجدع كده و يصون العيش و الملح.
ده ريتشارد السينمائى .. ريتشارد الحقيقى كان ملك شجاع و جسور احمر الشعر قوى البنيه و طويل بشكل ملحوظ .. بيصطاد الاسود بايده من غير سلاح .. وضيع النفس لا يلتزم باخلاق ... شديد النهم فى الاكل و الشراسه .. عاشق لمنظر الدم المسال .. لايتورع عن اى خطيئه فى الدنيا طالما ترضى طموحه و تحقق اهدافه .. منها انه قتل البابا نفسه فى حادثه مشبوهه لأنه اعترض على سلوك ريتشارد المشين.
قريت فى مجله معروضه فى المتحف البريطانى بحث فى اصول انساب الملوك الانجليز و سيرهم الذاتيه لمؤرخ مشهور اسمه جون هارفى "1948" بيقول ان ريتشارد كان عربيد السلوك الجنسى .. احم .. مش كويس يعنى .. مش عاتق .. رجاله و ستات .. و ذكر تحديدا انه اعترف و تاب عن السلوك ده مرتين .. بينما الدكتور جون جيلينجهام اصدر بحث مفصل اخر فى سنة 2001 فى جامعة اكسفور ذكر فيه ان ريتشارد كان طبيعى تماما .. ما بين هذا و ذاك .. يظل ريتشارد انسان قذر و سافل.
الكلام ده طبعا قبل ما ييجى عندنا .. لما جه عندنا بقى .. عمل ايه ؟؟
ريتشارد قتل الاسرى وقت دخوله عكا بعد ما امن الناس و الوالى على حياتهم .. خاف ان اكتر من 2000 اسير اعزل من السلاح يعوقوا حركته فقتلهم .. بالاضافه الى انه فى انتصاراته على صلاح الدين لم يكن شريف ولا نزيه .. الذبح كان سلوكه المفضل.
كمان فى حادثه غريبه جدا يلزم التنويه عنها توضح اد ايه ريتشارد كان حيوان فى صورة انسان.
ريتشارد كان بياكل خنازير دايما على الفطار .. الخنازير خلصت .. و الخنزير عموما حيوان ملوش مجال فى المنطه العربيه .. الطباخ بتاعه احتار يتصرف ازاى .. فدبح اسير عربى و طبخه لريتشارد .. رتشارد لاحظ ان اللحمه مختلفه عن كل يوم .. سأل الطباخ و الطباخ اعترف .. فريتشارد ضحك و عجبته الفكره و امره ان لحمته اليوميه الاساسنيه تبقى من لحوم الاسرى العرب.
مصدر (1) : Kings and Queens of Britain- جون جيلينجهام – اكسفورد 2001
مصدر (2) : الحروب الصليبيه كما رآها العرب – امين معلوف
.
ثامنا : الابراج الحربيه
اللعنه على الابراج
=============
الفيلم صور الابراج كسلاح من اخترع الصليبيين .. ده غير صحيح .. الابراج الحربيه و عجلات الحرب و المقاليع كلها اختراع القاده العرب فى الاندلس .. الكلام ده موجود بالصور فى بيبليوتيكا ناسيونال فى مدريد .. موجود كتب كبيره اوى و قديمه جدا .. ورقها اصفر و فيها صور من الابراج اللى استخدمها العرب للهجوم على قلاع الاسبان و البرتغاليين فى ايبيريا (اسبانيا و البرتغال).
.
تاسعا : السائل الفاتك بالابراج صدق الله وعده
===========================
انتبه يا رجل .. اتريد حرقنا ؟؟
اليوم يومك يا دمشقى
مين بقى الدمشقى اللى عمل السائل الفاتك بالابراج .. صدق الله وعده ؟؟
أبو الفضل جعفر بن علي الدمشقي .. عالم فى الاقتصاد و التجاره .. اهم انجازاته كان كتاب الاشاره الى محاسن التجاره صدر سنة 1175 .. وجدت اثار من الكتاب ده فى المكتبه الخديويه فى مصر.
فى افلام يوسف شاهين فقط .. يتحول عالم الاقتصاد الى عالم كيمياء و يتحول المسلم الى مسيحى و البطل الى خائن.
و لقد كان انا من اكل الجبنه ايها الصليبيون الخونه.
ازاى راجل بتاع اقتصاد يخترع السائل الفاتك بالابراج صدق الله وعده ؟؟؟
اساسا السائل ده اسمه الزاج الاخضر او حمض الكبريتيك المركز او بالبلدى مية النار .. ذكره جابر بن حيان مكتشفه الاصلى و قال عنه ... انه زيت يحرق من دون نار.
كتب الدمشقى فى الاقتصاد ما زالت موجوده للتداول بالمناسبه
.
عاشرا : السهم العربى المسموم
====================
"و بسهم عربى ... احييك" و راحت بصاله بصه كلها حنيه بقميص النوم البمبى المسخسخ .. و قالتله مات الملك ريتشارد .. فهو سخن و قاللها عاش الملك جون.
الحقيقه .. انا لو مكانه .. كنت كتبتلها كل اللى حيلتى .. و كنت رحت اخدت سيف و حاربت كل الجيوش دى لوحدى .. و قتلت صلاح الدين و حسام الدين و بهاء الدين و هيكارى و يوسف شاهين و اسيا و عبد الناصر نفسه لو لزم الامر .. و اجيبلها مفاتيح اورشليم ليها لوحدها فى ميداليه دهب عليها قلوب و دباديب و حاجات كده.
ليلى فوزى يا ناس .. قطعه من السكر المتغرقه عسل و كراميل و شوكولاته و متمرمغه فى مكسرات مختلفه .. الواحد ممكن يغمى عليا لو وقف قصادها كده من بعيد .. ما بالك بقى بزكى طليمات اللى فضل ماسك نفسه قصادها طول الفيلم ؟؟
طيب ده الفيلم ... الحقيقه بقى موضوع تانى خالص ... ريتشارد لا انضرب بسهم عربى ولا افرنجى و لا اساسا كان له تابع اسمه ارثر الامين ولا ارثر الخاين... ريتشارد مكانش بيثق فى اى احد و لا كمان قبل دعوة صلاح الدين بالدخول كحاج .. بالعكس .. رفض و قتل رسوله و حارب المسلمين بعدها حرب عنيفه .. بس انجرح جرح جامد فشحنوه على اوروبا يتعالج و فى الطريق اسره احد ملوك اوروبا و خد قصاده فديه كبيره من اخوه جون ..و استغل اخوه جون الفرصه و اشعل ضده ثوره مات فيها ريتشارد متأثر بجراحه و بسهم من طفل صغير.
و نعم الاخ يا حاج جون.
مصدر (1) : Kings and Queens of Britain- جون جيلينجهام – اكسفورد 2001
.
=======
مصادر عامه
=======
• الكامل فى التاريخ – ابن الاثير – الجزء العاشر احداث 588 هـ - صفحات 218 الى 228
• البدايه و النهايه – ابن كثير – الجزء الثامن – احداث 587 هـ - صفحات 466 الى 472
• قصة الحروب الصليبيه من البدايه الى عهد نور الدين زنكى – راغب السرجانى.
• الدوله الزنكيه - محمد على الصلابى
• صلاح الدين الايوبى - محمد على الصلابى
.
.
بس للأمانه .. انا بحب الفيلم ده جدا .. لو كنت ممثل .. كنت هعمل دور من اتنين .. يا اما ريتشارد علشان ابقى شرير و الناس تعرفنى .. يا اما ارثر الامين و طظ فى الرقابه .. دى ليلى فوزى يا ناس.
نهاركو زى الفل


عدل سابقا من قبل Admin في 4/12/2015, 15:55 عدل 1 مرات

Admin
Admin

الإسم : admin
العمر : 40
عدد الرسائل : 130
نقاط : 6205
تاريخ التسجيل : 19/03/2008

https://www.facebook.com/e.Genius2020?ref=bookmarks

الرجوع الى أعلى الصفحة اذهب الى الأسفل

حقيقة فيلم الناصر صلاح الدين Empty رد: حقيقة فيلم الناصر صلاح الدين

مُساهمة من طرف ahmed_hosni 4/12/2015, 15:35

ربنا يخليك يا استاذ سامح .. انا بس بسجل اعتراضى على وصفى بالكاتب الكبير .. انا ما زلت فى الخطوه رقم صفر .. يعنى موصلتش للخطوه رقم 1 حتى :-)

ahmed_hosni

عدد الرسائل : 1
نقاط : 3029
تاريخ التسجيل : 04/12/2015

الرجوع الى أعلى الصفحة اذهب الى الأسفل

الرجوع الى أعلى الصفحة

- مواضيع مماثلة

 
صلاحيات هذا المنتدى:
لاتستطيع الرد على المواضيع في هذا المنتدى