التطور وليس التغيير

[Admin]

لما بفكر في كم الاعتقادات اللي كانت عندي واتغيرت
والقناعات اللي اتبدلت
وبتفكر في واقعي ساعتها لما كنت مصدقها
بكتشف ان كل إنسان بيقيس الدنيا على نفسه

الدنيا حلوه لو انت مرتاح
ورحمه لو انت متطمن
وحشه لو انت مبتلى
ومؤقتة على حسب درجه زهدك

التنقل من معنى لمعنى وإحساس لإحساس وفهم لفهم للدنيا بيعتمد حرفيا بشكل كبير على حالتنا النفسيه وبحس ان قمه الغلط هو ان كل واحد يقنع الناس ان الدنيا حلوه او وحشه بناء على قياساته هو

وده ببساطه لأننا بننسى . بنتعامل مع المواقف من فوق التله وبننسى اننا في يوم من الأيام كنّا بنعافر علشان نطلعها . وبعد مابنوصل للقمه بننسى العذاب وبنشوف بس القمه وبنتهم باقي الناس بالجنون لانها بيعافروا وبيفشلوا . صحيح نيتنا كويسه لكننا في النهايه بنبقى عاملين زي أفقر أهل الارض اللي ربنا بيغمزه ف الجنه ويطلع يقولك انه عمره ماشاف عذاب .

اكتشفت ان حرام عليا اقعد ازعق في الناس واقولهم نطوا على التله واتخلصوا من افكاركم ومعتقداتكم لانها كانت نفس اللي كنت مؤمن بيه . بس انا نسيت . وبقيت حمل عليهم بيتقلهم مش حافز . تخيل واحد مليونير او ملياردير بيقولك هو انت فقير ليه . ويحاول يقنعك بإنه يوريك هو عمل ايه فتحس انك قدامك مليون سنه علشان توصله فتتقل وخطواتك تتقل .

كل شىء في الدنيا بيتطور . واحده واحده وهيفضل يتطور حتى الانسان بيتطور والظروف بتطور . ليه انا كمدرب تنميه بشريه اقبل التطور على نفسي وامنعه عن غيري واطالبه انه ينط ويتحول ؟

في سلسله محاضرات ان شاء الله هلف بيها مصر بعد مرجع من بره حابب احدث فيها رساله التنميه البشريه من كلام مجرد لأدوات فعليه تطور الواقع . في كل محاضراتي وآخرها محاضره اسكندريه كنت ضد كلمه “تغيير” اللي الناس بتتشدق بيها . لأنك ياذكي انت نفسك متغيرتش انت اتطورت . ليه بتوهم الناس بامكانية التغيير وانت عارف انها مستحيلة ؟

الناس مش محتاجه تتغير . الناس محتاجه تطور لاتجاه أفضل . ليه مستفدش من مشاكلهم ؟ ليه انسيهم الماضي وازعق ان الماضي خلص وفات ؟ ليه مستفيدش من أكتر لحظاتهم حزن وتعب ؟ ليه أقولهم ينسوا واخلق منهم شخصيات هربانه طول الوقت . ليه احسسهم انهم هما اللي غلط وانا ابو العريف ؟

رسول الله صلى الله عليه وسلم نجاح رسالته جيه بالتعب
سيدنا يوسف اتسجن
سيدنا موسى
سيدنا عيسى
سيدنا يونس

كل دول انت عارف عنهم ؟ كل دول انت أحسن وادرى منهم ؟

التطور هو سنه الكون
التطور ياساده مش التغيير
إنتوا زي الفل والله العظيم
مهمتي اقولك عافر وانا واقف على التله واقولك تطلع ازاي مش أقف احكيلك عن الجنه اللي انا عايشها وأشتمك واهزئك وامسح بكرامتك الارض واتهمك بالفشل والتغييب .

التطور طبيعي من اول النبات للإنسان للحاجه الساقعه

يومكم اجمل من يومي
انت زي الفل ومتصدقش حد
اقبل اللي انت فيه ، فكر في الاحسن وامشي في طريقك
وانت رجلك هتاخدك لفوق

بقلم : نهاد رجب